Ҳасанбой Дўсматов испаниялик боксчига қарши жанг қилади

Ҳаваскор боксда Олимпиада ва Жаҳон чемпиони Ҳасанбой Дўсматов 15 июль куни испаниялик боксчига қарши жанг қилади. Бу ҳақда Халқаро бокс ассоциацияси (IBA) Матбуот хизмати хабар берди.

Манбага кўра, жорий йилнинг 15 июль куни Таиланднинг Пукет шаҳрида IBA Champions' Night (Чемпионлар оқшоми) турнири бўлиб ўтади. Унда Ўзбекистон вакили Ҳасанбой Дўсматов испаниялик Мартин Молина Сальвадорга қарши жанг қилади.

Мусобақада 5 карра Жаҳон чемпиони ва 2 карра Олимпия чемпиони кубалик Хулио Ла Круз ҳамда унинг ҳамюрти Арлен Лопезнинг иштироки ҳам тасдиқланган. Мазкур турнирда проф бокс қоидаларига асосланган умумий 7 та тўқнашув, эркаклар ўртасида 3 дақиқалик 5 раундли, аёллар ўртасида эса 2 дақиқалик 5 раундли баҳслар ташкил этилади.

Шунингдек, ўша куни Ҳасанбойдан ташқари яна икки нафар ўзбекистонлик боксчи, Мужибилло Турсунов ва Асадхўжа Мўйдинхўжаевлар ҳам турнир ғолиблиги учун баҳс олиб боради. Улар қуйидаги рақибларга қарши жанг қлади.

-63 килограмм вазн тоифасида Мужибилло Турсунов (Ўзбекистон) – Хунатип Пиднуч (Таиланд):

-71 килограмм вазндаги Асадхўжа Мўйдинхўжаев (Ўзбекистон) – Дулат Бекбауов (Қозоғистон).

Маълумот учун, 2022 йилнинг декабрь ойида Абу-Даби мезбонлигида бўлиб ўтган IBA Champions' Night турнирида ғолиб спортчилар 30 минг доллардан пул мукофотига эга чиққанди. Бу сафарги мусобақанинг мукофот жамғармаси эса ҳозирча очиқланмаган.