Россия Украина Миллий гвардиясининг Донбассга ҳужум ҳақидаги махфий буйруғини эълон қилди

Россия Мудофаа вазирлиги Украина Миллий гвардияси қўмондонининг жорий йилнинг 22 январида қабул қилинган ва жорий йилнинг март ойида Донбассга ҳужум қилишни назарда тутувчи буйруғининг асл махфий нусхасини эълон қилди. Бу ҳақда журналистларга Россия Мудофаа вазирлиги расмий вакили генерал-майор Игор Конашенков маълум қилди.

“Россия Мудофаа вазирлиги Украина Миллий гвардияси қўмондони, генерал-полковник Николай Баланнинг 2022 йил 22 январдаги асл махфий буйруғини эълон қилди. “Украина Қуролли Кучлари бригадаси таркибида қўшма кучлар операциясида жанговар (махсус) вазифаларни бажариш учун 4-тезкор бригаданинг батальон-тактик гуруҳини тайёрлашни ташкил этиш тўғрисида”ги буйруқ. Ҳужжат Украина Миллий гвардиясининг Шимолий Киев, Жанубий Одесса ва Ғарбий ҳудудий бошқармалари раҳбарларига юборилган”, деган Конашенков.

Генералнинг таъкидлашича, “ҳужжатда Украина Миллий гвардияси қўмондонлиги топшириқларини бажариш учун масъул мансабдор шахсларнинг асл имзолари бор”.

Унинг сўзларига кўра, “Украина Миллий гвардияси қўмондонлигига киритилган буйруқда, қўшма кучларнинг “Донбасс” операцияси деб аталадиган зонада зарбдор гуруҳлардан бирини ҳужум операцияларига тайёрлаш режаси батафсил тасвирланган.

“Ҳужжат билан Миллий гвардиянинг 4-тезкор топшириқлар бригадаси батальон-тактик гуруҳининг ташкилий ва штат тузилмаси, уни ҳар томонлама қўллаб-қувватлашни ташкил этиш ва Украинанинг 80-алоҳида ҳаво ҳужуми бригадасига бириктириш тасдиқланган. 2016 йилдан бери Украина ҳаво-десант-ҳужум кучларининг ушбу тузилмаси америкалик ва британиялик инструкторлар томонидан Львовда НАТО стандартидаги ўқув дастурлари бўйича ўқитилаётганини алоҳида таъкидламоқчиман”, дея қайд этган Мудофаа вазирлиги расмий вакили.

Топширилган вазифалар

РФ Мудофаа вазирлиги вакилининиг айтишига қараганда, “буйруққа мувофиқ, Миллий гвардия қўмондони ўринбосари зиммасига 2022 йил 7-28 февраль кунлари Украина Қуролли кучларининг 80-алоҳида ҳаво ҳужуми бригадаси таркибида Миллий гвардиянинг батальон-тактик гуруҳининг жанговар мувофиқлаштиришни ташкил этиш вазифаси юклатилган.

“Эътиборингизни қаратмоқчиман - 4 банддан иборат бешта параграф кадрларни синчиклаб танлаш, барчасини психологлар томонидан текшириш ва уларнинг юқори мотивациясини таъминлаш масалаларига бағишланган. Бунинг учун Миллий гвардиячиларга “визуал ташвиқот, ахборот ва тарғибот материаллари, байроқлар ва матбаа маҳсулотлари” билан таъминлаш топширилган”, дейди Конашенков.

Унга кўра, Миллий гвардия қўмондонининг шахсий таркиб бўйича ўринбосарига “4-тезкор бригаданинг батальон-тактик гуруҳини маънавий-руҳий жиҳатдан таъминлаш, командирларнинг қўл остидагилар билан ички алоқаси, хабардор қилишнинг самарали тизимини ташкил этиш ҳамда раҳбарият қарорлари ва келгусидаги вазифаларни бажариш муҳимлигини ходимларга тушунтириш” топширилган.

“Буйруқнинг 12-бандида “хавфга тайёрлик” мезони бўйича психологик тестларда “қониқарсиз” натижа кўрсатган Миллий гвардия аскарларини жанговар ҳаракатларни мувофиқлаштириш ҳудуди ва жанговар махсус топшириқларни бажариш жойига юбориш тақиқланганига алоҳида эътибор қаратмоқчиман”, дея матндан иқтибос келтирди генерал.

Унинг таъкидлашича, буйруққа кўра, “Украинанинг Донбассдаги “Қўшма кучлари операцияси” доирасидаги жанговар топшириқларнинг бажарилишини таъминлаш мақсадида 28 февралгача кучларни жанговар мувофиқлаштириш бўйича барча чора-тадбирларни якунлаш буюрилган”.

Маълумот учун, Украинанинг Донбасс ўлкаси ҳозирда россияпараст сепаратист кучлар назоратга олган Донецк ва Луганск вилоятларининг катта қисмини ўз ичига олади. Украина ҳукумати ҳудудни расмий Киевга бўйсундириш учун 2014 йилдан кейин бир нечта ҳужумларни амалга оширган. Аммо Россия қўлловидаги тан олинмаган ДХР ва ЛХР ҳамон яшашда давом этмоқда