Махачев Топурия билан супер жанг ҳақида қарор қабул қилди

Россиялик ярим ўрта вазн тоифасидаги UFC чемпиони Ислом Махачев грузин миллатига мансуб испаниялик жангчи, енгил вазн тоифасидаги чемпион Илия Топурия билан жанг қилишга ёки Вашингтондаги Оқ уйда бўлиб ўтадиган турнирда иштирок этишга тайёрлигини маълум қилди. Бу ҳақда Махачев “Telegraf” нашрига берган интервьюсида сўз очди.

“Ҳозирда менинг вазн тоифамда чемпионлик учун курашишга лойиқ етарлича даъвогар бор. UFC менга янги мақсад белгилаши керак, шунчаки кутяпман”, дейди Махачев.

У шунингдек, Илия Топурия билан жанг бўлиши мумкинлиги ҳақида фикр билдирган.

“Бу ғоя менга ёқди. Агар UFC буни хоҳласа ва кўплаб MMA мухлислари ҳам бу жангни истаса, мен тайёрман”, дея қўшимча қилган у.

Шунингдек, Махачев Вашингтондаги Оқ уйда бўлиб ўтадиган турнир ҳақида тўхталиб ўтган. 

“Бу менинг кейинги жангимни ўтказишим мумкин бўлган майдонлардан бири. Рамазон ойи давомида бир ой машқ қилмайман, шундан кейин аста-секин тайёргарликни бошлайман. Оқ уй турнири бўлсин ёки бошқа саналар бўлсин, мен тайёрман”, дейди Махачев.

Маълумот учун, Махачев амалдаги ярим ўрта вазн тоифасидаги UFC чемпиони (77 кг) бўлиб, ушбу унвонни 2025 йил 15 ноябрда UFC 322 мусобақасида Жек Делла Маддаленани мағлуб этиб қўлга киритган.

Топурия эса амалдаги UFC енгил вазн тоифасидаги чемпион. 2025 йилда у вазн тоифасида юқорига кўтарилиб, Чарльз Оливейрани мағлуб этиб, бўш турган чемпионлик унвонини қўлга киритган.