Спорт қачон қайтади?

Коронавирус ҳаммани уйга қамаганидан ташқари кўпчиликни телевизор қаршисидаги энг яхши лаззатлардан – спорт мусобақаларидан ҳам маҳрум қилди. Ўртага нафақат совринлар, балки катта шартномалар, пуллар тикилгани боис, табиийки, ташкилотчилар ҳам тезроқ майдонга қайтишга уринишмоқда, мажлис кетидан мажлис қилиб, тахминий муддатлар ҳақида музокаралар ўтказиляпти. Ҳали бирор йирик турнирда аниқ саналар эълон қилинмаган бўлса-да, тахминий режалар бор ва ҳаммаси шундай давом этса, қуйидаги саналарда биз яна жонли спорт мусобақаларини томоша қилишимиз мумкин бўлади.

Чемпионлар Лигаси – (7 август)

Ўтказилмай қолган жавоб учрашувлари 7-8 август кунларига режалаштирилмоқда. Шундан сўнг, УЕФА ҳар 3-4 кунда ўйнаш ва финални 29 августга белгилашни кўзлаяпти. Шунингдек, чорак финалдан бошлаб, рақиблар уй-сафар эмас, бир мартадан ўйнаш орқали ғолибни аниқлаш тизими киритилиши ҳам мумкин.

Европа Лигаси (2 август)

Худди шундай. Нимчорак финалнинг «Севилья» – «Рома» ва «Интер» – «Хетафе» жуфтликлари ўтказилмай қолганди. Бу ўйинлар 2-3 август кунларида ўтказилиб, кейин барча жавоб учрашувлар 6 августга мўлжалланмоқда. Чорак финаллар 10 ва 13 август, ярим финаллар 17 ва 20 август, финал эса, 27 август куни Гданскда бўлиб ўтиши мумкин.

АПЛ (8 июнь)

Телевидениедан тушадиган юз миллионлаб маблағни йўқотмаслик учун инглизлар ҳар қандай шароитда ҳам мавсумни якунлаб қўйиш ниятида. Режага кўра бунинг учун беш ҳафта кетади. Ўйинлар эса, июнь ойида бошланиши мумкин. АПЛда жамоалар яна 9-10тадан ўйин ўтказиши керак.

Ла Лига (29 май)

Испания футбол федерацияси чемпионатни мана шу ҳолатда якунлаб қўя қолишни талаб қилди, аммо Лига кўнмади. Шундан сўнг, федерация раҳбари Луис Рубиалес ва Лига раҳбари Хавьер Тебас қарийб 8 соат давом этган музокараларда қатнашишди ва турнирнинг давомини ўйнашга келишиб олишди.

А Серия (31 май)

Бу ерда ҳам деярли ҳамма мавсумни давом эттиришни истамоқда. Яқинда «Брешиа» президенти агар мавсум тикланадиган бўлса, жамоасига унда қатнашишни тақиқлашини ҳам айтганди. Аввалига камида 7 жамоа чемпионат давом эттирилмаслигини истаётганди, лекин сўнгги мажлисда ҳамма бир овоздан чемпионат давом эттирилишига рози бўлди.

Бундеслига (9 май)

9 майда Бундеслига бошланиши ҳақидаги гаплар миш-миш эмас, балки Германия футбол лигаси директори Кристиан Зайфертнинг баёнотидир. Немислар энг кам риск билан машғулотлар ва учрашувларни ўтказиш режасини ишлаб чиқди. Табиийки, ўйинлар томошабинларсиз ўтказилади.

Лига 1 (3 ёки 17 июнь)

Ҳисоб-китобларга қараганда, Франция клублари чемпионат тўхтатилишидан бир ойда умумий 250 миллион евро йўқотади. Табиийки, француз клублари ҳам турнир давом этишидан манфаатдор. «Нега ишчиларни ишга боришга мажбур қиляпмиз, футболчиларни эса, йўқ?», дея ўринли савол берди яқинда «Нант» президенти.

Лекин икки ҳафтадан бери мавсумни давом эттиришнинг янги саналари ҳақида хабар чиқмаётганди. Лигада икки хил вариант бор: агар ҳаммаси яхши бўлса, ўйинлар 3 июндан, ёмонроқ ҳолатда 17 июндан бошланиши мумкин.

РПЛ (июнь ўрталарида)

27 апрель куни клублар чемпионатни томошабинларсиз давом эттирилиши бўйича йиғилиш ўтказади. Катта эҳтимол билан, айнан ўша куни аниқ саналар ҳам келишиб олиниши мумкин. Аммо баъзилар, масалан, «Спартак» хўжайини Леонид Федуннинг айтишича, томошабинларсиз ўйнаш қўшимча зарар, ундан кўра, умуман ўйнамаган яхши. Табиийки, РПЛда худди АПЛ ёки бошқа Европа Лигалари каби, улкан ТВ шартномалар йўқ.

Эредивизия (бекор қилиниши мумкин)

Нидерландияда барча оммавий тадбирлар ҳукумат томонидан 1 сентябргача тақиқланди. Демак, футболчиларда имконият кам, шунинг учун Федерация чемпионатни шу ҳолича тўхтатмоқчи.

УЕФА билан келишмовчиликлар чиқсама керак. Бельгияда мавсумни тугатишганда, УЕФА ушбу мамлакат клубларини еврокубоклардан дисквалификация қилиш билан таҳдид қилганди, лекин Европада бундай ҳолатлар яна бўлиши мумкинлигини эътиборга олиб, вазиятни очиқ қолдирди. Ташкилот ҳатто агар лигалар тўхтатилса, еврокубокларда қайси жамоалар иштирок этиши мумкинлиги ҳақида ҳам бош қотириб кўрмоқчи. 

«Формула-1»: бутунлай мавҳум.

НХЛ: бутунлай мавҳум

 Баскетбол (майда аниқ бўлади)

НБАда ҳам ҳозирча барчаси ноаниқ. «Биз бирор қарор қабул қилиш вазиятида эмасмиз ва бундай ҳолатга қачон келишимиз ҳам аниқ эмас», – деди НБА комиссионери Адам Сильвер.

Евролига плей-офф ташкил қилмоқчи, аммо регуляр ўйинлардан кейингина бунинг иложи бор. Бунинг ҳам қачон бўлиши номаълум. «Единая Лига» ёпилиб бўлди ва янги мавсумни октябрда бошлашмоқчи.

Теннис (13 июлдан кейин)

Июль ойидаги турнирларни ҳам бекор қилиш бошланди – ҳаммаси маҳаллий ҳукуматларнинг тақиқлари туфайли. Шу билан бирга, Германия, Франция, Британия, Надалнинг Мальоркадаги академиясида турли норасмий турнирлар ташкил қилиш режалари ҳам бор. Албатта, томошабинларсиз, аммо трансляциялар, ставкалар, ютуқ фондлари ва регламентлар бўлади.

UFC (9 май)

Тўғри, ҳатто Дэйн Уэйтнинг аниқ баёнотлари ҳам баъзида амалга ошмай қоляпти, аммо режа бўйича, турнир 9 май куни Флоридада бўлиб ўтади.

Манба: Kun.uz

125 Ko'rishlar

Leave a Reply

avatar
  Xabarlarga azo bo'lish  
Xabardor qiling